Det var klokka 18.03 at naudetatane rykka ut til Kvinnherad etter at ein bil køyrte i autovernet på riksveg 551 ved Ænes.
– Føraren av bilen var fyrst bevisstlaus ifølgje vitne, men han var bevisst då ambulansepersonell kom på staden, seier Eidsnes.
Med luftambulanse til Haukeland
Bilen blei treft av enden av eit autovern som gjekk gjennom frontruta på bilen.
– Akkurat korleis dette gjekk til, anar me ikkje. Det er utruleg flaks at det ikkje sat nokon i passasjersetet. Då kunne det heilt klart ha gått mykje verre, seier Eidsnes.
Sjølv om mannen var vaken då ambulansepersonell kom på staden, valte dei å rekvirere luftambulanse fordi mannen hadde fallande blodtrykk, noko som kan vere teikn på indre skadar.
Tilstanden til mannen er uvisst, ifølgje politiet.
(Artikkelen held fram under biletet)
Mistanke om ruskøyring
Det er mistanke om at mannen, som er frå Aust-Europa, køyrte bilen i rusa tilstand.
– Det er tatt blodprøve av han, og me skal sjølvsagt avhøyre han når han er i stand til det, seier Eidsnes.
Årsaka til ulukka er ikkje kjent.
Vegen er open
Entreprenør er på veg for å ta seg av skadane på autovernet som stikk litt ut i vegen.
Vegen var stengt ei kort periode etter ulukka, men klokka 20.15 flyt trafikken greitt på staden, ifølgje politiet.
NRK oppdaterar saka