– Den norske marknaden har vore underprioritert i ei rekke år. Reiselivsnæringa i Norge bør tenkje seg om og bruka ressursane på det norske segmentet, meiner direktør for Akvariet i Bergen, Kees Ekeli.
Nordmenn som ferierer i eige land står for over 70 prosent av overnattingar på hotell, campingplassar og hytter. Det gjer dei norske turistane til ei viktig inntektskjelde for norsk reiselivsbransje.
– Feil fokus
Likevel er mykje av reiselivssatsinga og marknadsføringa retta mot utanlandske turistar.
Ekeli rasar mot det han meiner er feil fokus i marknadsføringa, og seier det må satsast meir på mot nordmenn.
– Rådet er heilt klart. Begynn å omstrukturere dei midlane som ein har i dag. Og kanskje bruka meir midlar på å fortelje nordmenn kor fantastisk det er å vera i Norge.
Ein rapport frå Innovasjon Noreg syner at talet på utanlandske gjestedøgn steig med ein prosent frå 2011 til 2012. Men i same periode auka den norske delen med tre prosent.
Nordmenn reddar bransjen
Bransjesjef Wenche Salthella i NHO seier nordmenn er ekstremt viktig for reiselivsnæringa. Men ho er ikkje einig i at ein brukar for mykje pengar på marknadsføring i utlandet.
– Me ynskjer oss eigentleg meir midlar til det. Men ein kan godt seia at det burde vore høgare satsing og marknadsføring i Norge, det kan eg vera samd med Ekeli om, seier Salthella til NRK.
Ho fortel at reiselivsbransjen ikkje tek norske turistar i eige land for gitt.
– Etter finanskrisa såg me ein markant nedgang i det utanlandske marknaden. Då var nordmenn redninga for reiselivet i Norge, meiner ho.
– Mykje å oppleva her heime
– Norge er jo eit veldig fint land. Det er flott å få sjå litt av sitt eige land, og ikkje berre reise til Syden. Det er veldig mykje å oppleva her heime, seier Mari Sundstrøm.
Ho ferierer i eige land denne sommaren, og ynskjer seg meir informasjon om perlene som finst i Norge.
– Kanskje veit ein ikkje om alt som finst. Akvariet her i Bergen er kjempefint for småbarn som vi har med oss i dag.
Over 30 millionar kroner
Frå kontoret på Bryggen i Bergen, nyttar Fjord Norway over 30 millionar kroner i året på marknadsføring. Inntil i år har ikkje noko av desse midlane vore retta mot norske turistar.
– Nei, vi har hatt vårt fokus på det internasjonale marknaden, fortel marknadsdirektør Britt Dalland i Fjord Norway.
Sjølv om den norske turistandelen er stor og aukande, har Fjord Norway ingen planar om å endre på si satsing.
– Vi meiner, for fjord – Norge sin del i alle fall, at det er viktig at vi held fram med å satse på det internasjonale marknaden. Det er utruleg viktig for norsk reiselivsnæring å ha fleire bein å stå på, meiner Dalland.