Ferske spor i snøen viser at elg og rådyr stadig kryssar fylkesveg 40 i Numedal. I dag set viltmyndigheitene opp skilt langs vegen slik at bilistane skal vere merksame på faren for å kollidere med dyra.
Ole Knut Trondrud frå entreprenøren NCC spar snø og lagar plass til eit nytt elgfareskilt.
– Viltnemnda har bedt oss om å setje opp skilt frå her og ned til skogholtet, seier han medan han peikar nedover den opne sletta ved fylkesvegen.
Dei siste vekene har mange rådyr og elg blitt køyrt i hel på vegane mange stadar i Buskerud.
Høgsesong for påkøyrslar
Sju rådyr og to elg er påkøyrd det siste døgnet, de fleste på riksveg 7 og riksveg 35. Den siste påkøyringa skjedde i Ål i dag tidleg.
På vegane sør i fylket blei nærare 50 rådyr påkøyrde i desember. Ein sjeldan gong mistar folk livet i kontakt med opptil fleire hundre kilo tunge dyr. Kostnadane etter slike kollisjonar blir store for samfunnet.
No strøymer meldingane om vilt i vegbana inn til ettersøkskoordinator i Flesberg, Tom Ivar Stepien.
– Vi har fått meldingar både i går og i dag så vi har sett opp stadig fleire skilt i området. Seinast sist fredag var det påkøyrsel.
– Skal bilistane vere ekstra på vakt no?
– Ja, dei neste to-tre vekene er dei mest utsette i løpet av heile året, seier Stepien.