– Det var veldig spesielt og stemningsfullt.
Ann Sire Fjerdingstad fortel om den historiske hendinga på Geilo da 2017 blei til 2018 i natt.
Det tok ikkje mange sekund frå dei nye reglane om borgarleg vigsel trådde i kraft, til ordføraren i Øvre Eiker utførte sitt fyrste oppdrag.
Set pris på den nye oppgåva
– Me fylgde med på klokka og rusla bort i slalåmbakken i god tid før midnatt. Da klokka bikka 00.00 sat me i gang med å lese teksten og eg kunne etter kvart erklære ekteparet for rette ektefolk.
– Etterpå gjekk me inn og tok nokre glas champagne. Det var ei fantastisk feiring.
Det var Bygdeposten som fyrst omtalte bryllaupet mellom Eli Kari Gjengedal, kjent som vêrmeldar på TV 2 og Tom Saxegaard frå Drammen.
2018 er året kommunane tek over oppgåva tingretten har hatt til å vie par som vil gifte seg borgarleg.
Fjerdingstad set pris på dei oppgåvene, sjølv om det betyr meir helgejobb og denne gongen avbryting av ferien.
– Det er veldig hyggeleg å få lov til å erklære nokon for rette ektefolk. Det er ein fin del av jobben, og noko heilt anna enn å sitje kommunestyret og krangle om saker.
Alt 19. januar er ordføraren klar for ny vigsel, og Høgre-ordføraren trur kommunen vil ta hand om rundt 20 vigslar i året.
Spesiell vigsel
Denne vigselen var i tillegg heilt spesiell for ordføraren som kjente ekteparet frå før. Ho var blant gjestene da ekteparet fyrst gifta seg i Las Vegas i 2014. Men dette ekteskapet blei aldri godkjent av norske myndigheiter.
Da lovendringa blei kjent blei Fjerdingstad kjapt booka til vigselen på Geilo sjølv om ho er ordførar i Øvre Eiker.
Med tillating frå ordføraren i Hol gjekk det greitt, og Fjerdingstad lovar også sine eigne innbyggarar stor valfridom.
– Om ein ikkje vil bli vigd av politikarar, kan både rådmann og kommunalsjef utføre vigsel hos oss. I tillegg til gruppeleiarar, ordførar og varaordførar.
Og kanskje blei ho i natt landet fyrste ordførar til å seie dei magiske orda.
– Det skal godt gjerast at nokon var tidlegare ute, men kanskje var nokon like kjappe, ler ordføraren.