Regionlensmann i Hallingdal, Inger Lill Lanes, seier til NRK at det er omstenda rundt brannen som gjer at Kripos blir kopla på brannetterforskinga.
– Vi går ut breitt i etterforskinga, og kan ikkje sjå bort frå nokon årsak til brannen. Det er klart at vi tar med oss brannane i asylmottak i Sverige når vi ser på det som skjedde i Hemsedal i natt. Men det er ingenting som førebels tyder på at den er påsett, seier Lanes.
Mykje tyder på at brannen starta i eit eldre kjøkken i tilknyting til administrasjonsbygget på Hemsedal statlege mottak. Kjøkkenet er eit gamalt hotellkjøkken, og har ikkje vore i bruk.
– Det har vore reparasjonsarbeid på det elektriske anlegget i kjøkkenet i den seinare tida. Men vi konkluderer ikkje i noko som helst retning, seier Lanes.
Skal bruke brannhund
Pressekontakt i Kripos, Ida Dahl Nilssen, stadfestar overfor NRK at Kripos har blitt kontakta av Nordre Buskerud politidistrikt med spørsmål om bistand.
– Vi har fått ei oppmoding om å hjelpe til med brannteknisk bistand og brannhund. Vi må saman med politidistriktet vurdere når det vil vere hensiktsmessig for våre fagfolk å reise til Hemsedal, skriv Nilssen til NRK.
Både leiinga ved asylmottaket og andre har blitt avhøyrde om brannen.
– I løpet av natta har vi avhøyrt fleire vitne, og vil halde fram med det utover onsdagen, seier regionlensmann Lanes.